အေပို.စ်ကို ရွီးဖို.လို.မှန်းနီစော် ကြာဗျယ်။ စာမလုပ်ဖြစ်သိခါ တွက်စရာ ချက်စရာချေတိ မလုပ်နိုင်သိလို.မရွီးဖြစ်။ 

အဂု အကျွန်တွက်ပြချင်စော်ကတော့ခါ နိုင်ငံခြားမှာ အလုပ်လုပ်ရုန်းကန်နီရရေ ရခိုင်သမ တစ်ယောက်အနီနဲ. သင့်တော်ရေ ရခိုင်သားတစ်ယောက်တွိဖို. ဇာလောက်ခက်ခဲလေဆိုစော်ကို ပြချင်လို.ပါ။

ရခိုင်သမချေတိ အလုပ်ထွက်လုပ်တေဆိုခါကပင် ဖြစ်ကတတ်ဆန်း ပညာမတတ် စာမတတ် ထွက်လာရေလူရှားပါရေ။ ဘွဲ.ရပညာတတ်ပြီးကေ လခသင့်တင့်ရေ အလုပ်နဲ. အိနြေ္ဒရရ အလုပ်လုပ်နီကတ်စော်များပါရေ။ မဟုတ်ကေလေ့ နာစ့်အကူ အနိမ့်ဆုံး ထားပြီးကေ တဖြည်းဖြည်းနဲ. တက်လမ်းရှာနီကတ်စော် မမချေတိ အများကြီးရှိပါရေ။ အကျွန်ရို.မမချေတိ မှာ အကျင့်တစ်ခုက ကိုယ့်ထက် ပညာရေးမှာသာရေ လူကိုပဲ အထင်ကြီးပြီးကေ ယူချင်စိတ်ရှိရေ။ အကျွန်လေ့ ယင်းပိုင်။ တခြားမမချေတိလေ့ ယင်းပိုင်ရှိဖို.လို.ထင်ရေ။ ကိုယ့်ထက်မသာကေတောင် တန်းတူရှိရဖို.။ ယင်းချင့်စော် ရခိုင်သမတိ သွီးကြီးစော်မဟုတ်။ ကမ္ဘာပြတ်သား မမတိယင်းပိုင်ရှိဖို.။ ယောက်ျားချေတိကလေ့ ကိုယ့်ထက် ပညာရေးအရသာရေ မမချေတိကို ဆိုကေ မလိုတတ်ကတ်ပါ။ အဓိက က ယောက်ျားမာနကို ထိခိုက်တေ ထင်ပါရေ။ မမချေတိကတော့ ပညာနဲ.ဥစ္စာ နှစ်ခုကို အဓိက ထားတတ်တေ။ ရုပ်ရည်က နောက်ဆုံးကပါ။ ယင်းချင့်လေ့ လူ.သဘာဝ။

ဆိုရေခါ ဘွဲ.ရ ပညာတတ် အေမှာ အလုပ်လုပ်နီရေ မမချေတယောက်ဆိုလိုက်ပါဖိ။ ရခိုင်သားကိုပဲ ယူဖို.လို. စိုင်းစားထားရေ မမချေတစ်ယောက်အတွက်  ရခိုင်သား ကကောင်းမမွန်ချေ တစ်ယောက်ကို ရဖို. အခွင့်အရေးကို တွက်ကြည့်ကတ်ပါမေ။

ဥပမာ - စင်္ကာပူ
စင်္ကာပူကိုလာရေ ရခိုင်သား ၁၀၀၀မှာ ၆၀၀ စော် အလုပ်ကြမ်းနဲ.လာရစော်များပါရေ။ အေချင့်ကို ပြောလို. နှိမ်စော်မဟုတ်ပါနန်း။ အကျွန်.သူငယ်ချင်းတိထဲမှာ ယယိုင်ကျကျေး သသိပ်ပပိတ်နဲ. သင်္ဘောကျင်းမှာလုပ်ပြီးကေ အိမ်ကမိဘကို အကျွန်ရို.ထက်အဆ ဖေ့သာပို.လို. ရန်ကုန်မှာ အိမ်ဝယ်ထားစော်လူတိ မကန်ပါ။ တချို.က ဘွဲ.ရဖြစ်ယင့်ပင် အဆင်မသင့်လို. အကြောင်းအမျိုးမျိုးကြောင့် သင်္ဘောကျင်းမှာ Construction တိမှာ လုပ်နီရစော်လူတိ အပုံရှိပါရေ။ ယင်းလူတိကို အုပ်စု (A) လို. သခေါ်လိုက်ပါမေ။ နောက်ထပ် ၂၀၀လောက်က တစ်ဆင့်တက်ပြီးကေ စက်ရုံမှာ စူပါဗိုက်ဆာ အဆင့်၊ Construction မှာ ဖိုမန် အဆင့်တိ နဲ.လုပ်နီဂတ်တေလူတိ ရှိပါရေ။ သူရို.လခကို အထင်မသေးပါကေ့။ လုပ်သက်နဲ. ရထားရေလူတိဖြစ်တေအတွက် ကိုယ့်ထက် လခ အများကြီးကောင်းပါရေ။ အုပ်စု (B) လို.ထားလိုက်ပါမေ။ နောက်ထပ် ၁၅၀ လောက်က အင်ဂျင်နီယာရို.  အိုင်တီရို. အကောင့်တန်.ရို. အော်တိုကဒ်ရို.နဲ. အလုပ်လုပ်စော်လူတိ ရှိပါဖို.။ အုပ်စု (C)ထဲမှာထည့်လိုက်ပါမေ။ နောက်ထပ်၅၀ ကို (သေချာပါရေ ၅၀မပြည့်ပါ) ကျောင်းသား သို. အေက ဘွဲ.ရပြီးကေ အလုပ်လုပ်နီရေလူတိထဲမှာ ထည့်လိုက်ပါမေ။ အေချင့်ကတော့ အုပ်စု (D) ယင်းပိုင်ဆိုကေ လူတစ်ထောင်ထဲက မှ တခြားထည့်သွင်းစဉ်းစားရဖို. အချက်အလက်တိကို ဇယားချေနဲ. အေပိုင်ချရွီးလိုက်ပါမေ။

 ယင်းဇယားကိုအခြေခံပြီးကေ  Probability ဖော်မြူလာနဲ.တွက်လိုက်ဖို.ဆိုကေ မမချေတစ်ယောက် ရည်းစားရှာရေခါ
၁။ လပျိုနဲ.ရနိုင်ရေ အခွင့်အလမ်း ဇာလောက်ရှိလေ ? (ရည်းစားလက်ရှိနဲ. တခုလပ် မုဆိုးဖို အိမ်ထောင်ရှင် တိမပါ)
Probability =  ၃၁၀/၁၀၀၀= ၀.၃၁ x ၁၀၀% = ၃၁ %

၂။ အနည်းဆုံး အုပ်စု (B)လောက်က လူနဲ. အထက်ကို (လူပျိုထဲက) လိုချင်ေ၇ ဆိုကေ အခွင့်အလမ်း ရဖို.ရာခိုင်နှုန်းဇာလောက်ရှိလေ  ?
Probability =  ၁၁၀/၁၀၀၀= ၀.၁၁ x ၁၀၀% = ၁၁ %၃။ လူပျိုလူလွတ်ထဲကမှ အုပ်စု (C) နဲ. (D) အထဲက ပဲ လိုချင်ရေ ဆိုကေ ဝါ။
Probability =  ၇၀/၁၀၀၀= ၀.၀၇ x ၁၀၀% = ၇ %
၎။ လူပျိုတိအပြင် ရည်းစား လက်ရှိတိကို ပါထည့်စဉ်းစားဖို. ပြတ်လားဂေဝါ ရည်းစားနဲ. ဆိုကေ
Probability =  ၅၂၀/၁၀၀၀= ၀.၅၂ x ၁၀၀% = ၅၂ %
အေပိုင်ဆိုကေတော့ နည်းနည်းအခြေအနေ ကောင်းလားရေ။

ယဂေလေ့သင့် ယင်းချင့်စော် အခြေအနေ မှန်လာ။ ပီးထားရေ ဒေတာ တိစော် ခန်.မှန်းရာ ဖြစ်ပြီးကေ အတိအကျ မဟုတ်ပါ။ အားလုံးအလုပ်လုပ်နီစော် လူထဲမှာ လူပျိုလူလွတ်နည်းပြီးကေ အိမ်ထောင်သည် ရည်းစားရှိရေလူတိ များပါရေ။ ရည်းစားထားရေ အိမ်ထောင်ပြုရေဆိုစော်မှာ လူပျုိုတိုင်းကို မျက်စပစ်လို.ရစော်ကမဟုတ်။  ကိုယ့်ကိုကြိုက်ဖို.လိုသိရေ။ ကိုယ်ကလေ့ နည်းနည်းပြန်ကြိုက်ဖို.လိုသိရေ။ အကျင့်စရိုက်ချေ ကောင်းဖို.ကလေ့ လိုသိရေ။ မိဘ အသိုင်းအဝိုင်း ဘက်ဂရောင်းချေကလေ့ ကြည့်ဖို.လိုသိရေ။ ရည်းစားထားစော် အလွယ်ချေဆိုကေ တောင်မှ အိမ်ထောင်ပြုစော်က အခက်ကြီးပါ။ ရည်းစားဖြစ်တိုင်း အိမ်ထောင်ကျဗျယ်လား ယဂေ။ ရည်းစားသည် ခင်ပွန်းလင်မဟုတ်။ လင်ဖြစ်လာဖို. Probability ရှိနိုင်ရေ လူတစ်ယောက်ရာဖြစ်တေ။ အချစ်ဦးနဲ. ယူဖြစ်တေ လူဇာနှစ်ယောက်ရှိပါလေ။ ရှားပါရေ။ ဒုတိယ သို. တတိယ တစ်ယောက်နဲ.မှ တတည့်တည့်ကျလားစော်တိရှိပါရေ။

 Relationship တိ ရှိလာရေ အခါ များသောအားဖြင့် ၂ ယောက်မြောက်လူ၊ သို. သုံးယောက်မြောက်လူနဲ. အဆင်ပြေလားစော်များပါရေ။  ယင်းပိုင်ဆိုဂေ  Relationship လုပ်တေအခါလူအများစုဧ။်  အိမ်ထောင်ကျကိန်း Probability ရေ ၀.၃၃ ရှိရေ ဆို ကတ်ပါမေ။
( ၃ယောက်မြောက်နဲ.လက်ထပ်ဖြစ်တေလူများရေ ဆိုရေ သဘော)။ ပထမဆုံး ထားရေ ရည်းစားနဲ. ရဖို. Probability ဇာလောက်ရှိပါဖို.လေး။ အကျွန်ရို. Bernoulli Random Variable of Probability Formula မော်ဒယ်ကို သုံးကြည့်ကတ်ပါမေ။
P (N=1)= (1/3) (2/3)^1-1= 1/3= 0.33

ဂဏန်းငယ်ရေ အတွက်နဲ. Common Sense နဲ. ရရိုးချေတွက်ပစ်ကေလေ့ ရပါရေ။ ပထမ တစ်ယောက်နဲ. ရဖို.အခွင့်အရေးသည် ၃၃% ရာ ရှိပါရေ။ ဒုတိယ တစ်ယောက်နဲ. အိမ်ထောင်ကျကိန်းဆိုကေ
P (N=2)= 1-P(N=1) =  1 - (1/3) = 2/3= 0.67 = 67

အေမော်ဒယ်ကို သုံးစော်မှာ  အပြစ်ပြောလို.ရစော်တိ ရှိပါရေ။  Pass/Fail ပုံစံမျိုးရာ သုံးရေ မော်ဒယ် အတွက်ကြောင့်  ဖြစ်နိုင်ခြေ ၃ ခု ရှိရေ ကိစ္စ မှာ အကောင်းဆုံး Represent လုပ်ချင်မှ လုပ်နိုင်ပါဖို.။ အနည်းဆုံးတော့ ကိုယ်လိုချင်စော် ပွိုင့်ကို ရလားပါဗျယ်။ ပထမ ရည်းစားတစ်ယောက်နဲ. အ်ိမ်ထောင်မကျကေ ဂါ။   အခွင့်အလမ်းတိ ပိုလို.နည်းလားဗျယ်။

ကိုယ့်ကို ကြိုက်လာရေ လူတိုင်းကိုလေ့ ကိုယ်က သဘောမကျ။ ကိုယ်ကြိုက်တေ လူကလေ့ ကိုယ့်ကို ပြန်မကြည့် ဆိုကေ မမချေတိ မှာ ရခိုင်သားကကောင်းမမွန်ချေ တစ်ယောက်နဲ. အိမ်ထောင်ကျဖို. အရေးစော် ကောင်းခက်ခဲပါဖို.ဂါ။ တစ်ခုကောင်းစော်က နိုင်ငံခြားကို ရောက်နီရေ လူတိထဲမှာ ယောက်ျားချေတိက လူများစု ဆိုရေ ခါ သူရို.ခမာတိထက်တော့ ကိုယ်က ပိုလို. အရွီးရ နည်းနည်းလွယ်ပါဖို.ထော။ မမချေတိ ဖက်က ကောင်း ကွန်ပလိန်းလေ့ မတက်နိုင်။ ယောက်ျားချေတိ ဖက်ကလေ့ ရခိုင်သမ မယားတစ်ယောက်ရဖို. ယလောက် လွယ်ဖို. မဟုတ်။ ပိုလို.ရာခက်ဖို.။ ယဂေလေ့ ကိုယ်ပြည် မှာ ပြန်ယူဖို.ဆိုကေ အပုံကြီးပါ။ နိုင်ငံခြားပြန် ဆိုစော်နဲ. ကွမ်းသီးတော သဌေးသမီးရှင်တိ ဝယ်ဖို. ရောက်ဖို.စော်မှာ မပြောကေ့။ ကောင်းစိတ်ပူစရာတော့ မရှိပါ။း) ယောက်ျားချေ တော်တော်များများကလေ့ စင်္ကာပူမှာ ရောက်နီရေ ရခိုင်သမတိကိုဆိုကေ လလွဆာလို. ရွာပြန်လို.ရာ ယူမေ လို.ပြောကတ်ပါသိရေလေ။  စလုံးက စော်တိ ကိုဆိုကေ ထားရာထားလို. ကွမ်းတံထွီး ပက်ပက်နဲ.ပင် အရှင်လလတ် ကိုယ့်ရှိက ပြောစော် ရခိုင်သားတိနဲ. တွိဖူးပါယင့်။ စေတနာမထားဆိုကေလေ့ စိတ်ပုတ်တေ ပြောကတ်ဖို.ဒေဂါး။ 

အဂုခေတ်မှာ ကောင်းရေ လို.ပြောရဖို.လား ဆိုးရေလို.ပြောရဖို.လား အွန်လိုင်းက ကြိုက်ကတ်စော်တစ်ခု ပေါ်လာပါရေ။ ရစော်လူနဲ. ကြူစော်ကို အားမပီးကေလေ့ ကောင်းစော်အချက်ချေတိကို ပြောပြပါမေ။

• ကိုယ့်ရခိုင်အချင်းချင်း အွန်လိုင်းက အသိအကျွမ်း ဖွဲ.စော်ကို လက်ခံပါရေ။ ယဂေလေ့ မမ ကျွန်တော် ရည်းစားလိုချင်လို.ပါ ရပါဖို.လား ဆိုကေတော့ တစ်ခါတည်း ဘန်းပလိုက်ပါရေ။ အပြောအဆိုချေတော့ စကေတဗွေ လိမ္မာဖို.လိုရေ ဆိုစော်ကို သတိပြုရပါဖို.။ ယယိုင်ကျကျေးပြောကေ ဇာရခိုင်သမမဆို ရခိုင်သားဆိုကေ လက်ခံ စကားပြောပါရေ။ စခါကပင် ဆင်နဲ.နင်းလို.ဝင်ပိုင် မဝင်ဘဲနဲ. ရင်းနှီးအောင် အယင်လုပ်ရရေ ဆိုစော်ကို သတိထားကေဗြီးပါဗျယ်။ မထိတထိ ဗမာပိုင် ကြူသလိုလို စသလိုလိုပြောခြင်း၊ မိန်းလေးကသိပ်လှတာဘေး၊ သိပ်ကျတ်သရေရှိတာပေးစသည်ဖြင့် မြှောက်ပင့်ပြောခြင်း တိရေ Self Suicide လုပ်နီရေ ဆိုစော်ကို သတိရပါ။
• ချစ်လို. ကြိုက်လို. ဝါ ရလားလို. မီးကေ ရရေ လို.ဖြေပါမေ။ ဇာဖြစ်လို.လဲ ဆိုကေ ကိုယ့်ရခိုင် အသိုင်းအဝိုင်းစော် အငယ်ချေပါရာ။ လူတစ်ယောက်အကြောင်းကို အချိန်မရွေး စုံစမ်းလို.ရပါရေ။ ယင်းလူရှရှုပ်ပပွီ ဟုတ်မဟုတ်။ မိသားစု ဘက်ဂရောင်းကို တစ်ပတ်မကြာ အားလုံး သိရပါရေ။ အချင်းချင်းဆက်နွယ်နီစော် လူတိပါရာ။
• မမချေ ယောက်ျားချေတိ အတွက် ရွီးစရာ Option တိ များလားပါရေ။ ပြည်တွင်းက လူတိနဲ.ပါ အဆင်ပြေပြေ ကြူလို.ရရေအတွက် သမီးရည်းစား ရှိပြီးသားလူတိမှာလေ့ အဆက်အသွယ်မပြတ်လားအောင် ထိမ်းထားလို.ရရေ။ 

ကိုယ့်အချင်းချင်းကလွဲပြီးကေ ကျန်စော် လူမျိုးတိနဲ. ဆိုကေတော့ ရည်းစားသနာ အွန်လိုင်းက ဖြစ်ဖို. ယက်ဖို. အားမပီးပါ။ ဇာကမှန်းမသိ၊ ဇာပိုင်မှန်းမသိ၊ ဇာသူ.သားသမီးမှန်းမသိပဲနဲ.။  အပျော်အပျက်သမားတိ များစော်ပါရာ။ 

ယလောက်ဆိုကေ အေတော့ပစ်ကို လက်စဖြတ်လို.ရဗျယ်ထင်ရေ။ သူငယ်ချင်းံမမချေ တစ်ယောက် ရခိုင်သားတိ ရွီးရခက်ကြောင်းညီးညူနီရေ။ ရုပ်လှ ပညာတတ် ဖေ့သာရှိ စိတ်ကောင်း နှလုံးကောင်း နဲ. ရခိုင်သားချေတစ်ယောက် ရဖို. အရေးစော် ၂% လောက်ရာ ရှိကေလေ့ အတတ်နိုင်ဆုံး လက်မလျှော့ပါကေ လို.ပြောချင်ရေ။ အချိန်တန်ကေ နပိန်ကန်လားပါလိမေ။ (အရာ နသိုးကြီးကန်လားဂ ဒုက္ခ) စိတ်ရှည်လက်ရှည်နဲ. စောင့်ဖို.ရာလိုရေ။ စိတ်မရှည်ကေ ဖွင့်ပြောပလိုက် (ကိုယ်သဘောကျလူရှိကေ ပြောစော်ရာ) ။ အယင်တရက် က ထမင်းချက်စားကတ်ခါ ပြောဖြစ်စော်ချေတိကို သတိရလို. ရွီးလိုက်စော်ပါရာ။ အကျွန်နဲ. မြတ်ရှင်ကတော့ ထီပေါက်ထားဗျယ် (ထီလက်မှတ်ကို အသေအချာသိမ်းထားပါရေ မပျောက်အောင်)  ဖြစ်တေအတွက်နဲ. ယင်းသူငယ်ချင်းံ တစ်ယောက် အယင်ဆုံး သူချစ် ကိုယ်ချစ် ရခိုင်သားချေ တစ်ယောက်ကို ရပါဇီလို. ဆန္ဒပြုလိုက်ပါယင့်ဂါး။း) 

ခိုင်ဝေဇံ

ထုံးစံ အတိုင်း လူစုပြီးကေ ထမင်းချက်စားဖို.အစီအစဉ်ကို စနီနိခါ လုပ်ဖြစ်တေ။ မြတ်ရှင်က မိုးလင်းကပင်ရောက်လာပြီကေ ဈီးလားခီကတ်တေ ၂ ယောက်။ ဘရေးဂါး ဟင်းရည်သောက် ချက်ချင်စော် ဘရေးဂါးရှာလို.မရခ လကျောက်သားရပါလတ်တေ။ ရကြက်ကလေ့ လလတ်ဆဆတ်မရှိခါ နောက်တစ်နီရာကနီ ဝယ်ဖို.ဗျယ်ဆိုပြီးကေ ပါလတ်ကတ်တေဗျယ်။ အပြန်လမ်းမှာ မုန်.ဟင်းခါး ဝင်လို.စားခသိရေ။း) အိမ်အောက်မှာ ဗမာဆိုင်ရှိရေ အတွက်နဲ. မုန်.ဟင်းခါး၊ ရခိုင်မုန်.တီ ( တခုလေ့သင့်မကောင်း ) အုန်းနို.ခေါက်ဆွဲနန်. ကြာဇံချက် ကြိုက်တေ အချိန်စားလို.ရရေ။

ယဂေ အချက်ကောင်းနှစ်ယောက် အိမ်ပြန်လာခါ ၁၀နာရီ ထိုးဗျယ်။ ၁၂ နာရီခါ လူတိ အားလုံးကိုဖိတ်ထားစော်။ ဟင်းက ၅ မျိုးလောက်ချက်ဖို.စော်မှာ။ ခေါင်းတိတောင် ကြီးလာပိုင်တွိရေ။  ထမင်းတစ်အိုးအယင်တည်ပြီးကေ ရကြက်ဝယ်ဖို. ဗြီးလို.ထွက်ရရေ။  မြတ်ရှင်နဲ. နှစ်ယောက် ဝတုတ်ဖျင်၊ ကင်းစွန်းရွက်ချိုး၊ ရီကြက်ပြုတ်။ ရည်းစားဖုန်းကလေ့ တစ်ဖက်ပြောရသိရေ။ အလုပ်များချက်။ ယင်းမှာတစ်ယောက်ရှိကေ ဘလောက်ပျော်မေမသိ အေပိုင်လုပ်စားရကေ။ အိမ်း ရွီးယင်းနဲ. လမ်းချော်လားယာ။း)

တနားနီကေ ဇံဇံရောက်လာရေ။ မြတ်ရှင်က လကျောက်သားဟင်းရည်အိုးကို ဆရာကြီးလုပ်လို. ယင်ရေ။ မသေချာခါ အမင်သည်ကို ဖုန်းဆက်ပြီးကေ မီးမြင်ယင့်။ ပြီးလို.မြည်းကြည့်လိုက်ခါ လလီးပပိုက် ကောင့်ယင့်ထော။ အားလုံးသူက အချက်ကျွမ်းရေလူတိ မဟုတ်။ လုပ်ချင်စော် လုပ် ပျင်ချင်စော်ပျင် လုပ်ကေလေ့ ဖြစ်လားဝါဒေ။ ဝတုတ်တစ်အိုးလေ့ ချက်လို.ပြီးရေ။ ကင်းဇွန်းတအိုးကျော်ရေ ဇံဇံမှာ။ ယဂေ ၁၂ နာရီထိုးယာ။ ဧည့်သည် နောက်ထပ်သုံးယောက် မပေါ်လာသိမ့်။ ရခိုင်သားနာရီ နဲ.လာဖို.ရှိဖို.လို.တော့ တွက်ပနာ ငရုတ်သီးကြိတ်ကတ်တေ။ ဇံဇံ က ထမင်းတိ ခူးနီဗျယ်။ ဝမ်းဆာ မခံနိုင်ဗျယ် ဆိုဝါ။

အားလုံးလေ့ ပြီးဗျယ်။ ၁၂ နာရီခွဲလောက်ရာ ခင်ဥမ္မာထွန်းရောက်လာရေ။ စားပလိုက်ကတ်ဖို.ဗျယ်ဆိုပြီးကေ ဆွဲကတ်ပျယ်မနားယေ။ ကျော်ဖြိုးဝေ က အရက်နာကျလို. အခုမှ နိုးသိဆိုဝါ။ လာဖို. နောက်ကျဖို.လတ်။ ဖြစ်ရဖို.။ အေးမြတ်မွန်လေ့ လာဖို.နောက်ကျဖို.လတ်။ လာခါမှလာ တပျင်းအုပ်ကတ်စော်ဗျယ်။ ရကြက်သုပ်တောင်မှ ယလောက်မစွန်။ ဝတုတ်တစ်အိုး တဝက်လျော့လားရေ။ ငရုတ်ကြိတ်ကလေ့ စွန်ရေ။ သံပရာသီး တိ ပြိုပါရေ  အချဉ်လိုရေ အချဉ်လိုရေ နန်.ပင်ထည့်ကတ်စော်။ ကျော်ဖြိုးဝေရောက်လာရေ စားရေ တလောင်ဗွန်းတည်း။ ဇံဇံက ဘာဘီကျူးလုပ်ဖို.လားဗျယ်။ အေးမြတ်မွန်နဲ. သူငယ်ချင်း ရခိုင်သမချေတယောက်ရောက်လာရေ။ သူရို.ကမှ အားရပါးရ စားစော်။ ကိုယ်၇ို.နဲ. ဂိုဏ်းတူတိ။

 ဖိတ်ထားစော် လူတိလေ့ အားလုံးရောက်ရေ။ ချက်ဖို. စီစဉ်ထားစော်တိလေ့ အားလုံးချက်ဖြစ်တေ။ ထမင်းလေ့ မပို ဟင်းလေ့ အားလုံးနီးပါးကုန်ရေ။ ယပြီးခါမှ စိတ်ချမ်းသာလခရေ။ အစောကြီးလာကူပီးရေ မြတ်ရှင်နဲ. ဇံဇံကို ကျေးဇူးတင်ရေ။ မြတ်ရှင်ကတော့ အရာတစ်ပတ်ခါ ကြာဆံသုပ်စားကတ်မေဟေး လို.ခေါ်တောင်းလို. လားခရေ။း) တွိကတ်မေ နင်းရာဟေး နောက်အပတ်ခါ။း)

ကျော်ဖြိုးဝေနဲ. အေးမြတ်မွန်လာခါ အလောသုံးဆယ်နဲ.ဆိုခါ ဓါတ်ပုံ၇ိုက်ဖို. ယက်ဖို. မိလားရေ။း) နောက်တစ်ခါပေါ့။

စားနိုင်ကေ ကိုယ့်ဖို.
ခိုင်ဝေဇံ

ဆိုပါဖိ


ရွာတစ်ရွာမှာ မိအိုဖအို နှစ်ပါးကို လုပ်ကျွေးနီရေ ကလေ့မေချေ တစ်ယောက်ရှိရေဆိုပါဖိ။ ယင်းကလေ့မေချေစော် တစ်ရက်နိခါ မြစ်မှာ ရီကူးယင်းနဲ. ၇ီနစ်ပါရေ။ ယင်းခါ လှေတစ်စင်းလာလို.ကယ်ပါရေလတ်။ ယင်းလှေမှာ ရွာက အရွယ်တူကလေချေ  ၃ယောက်ပါပါရေ။ ယင်းမမချေကို တစ်ယောက်က ဆင်းလို.ကယ်ပြီးကေ လှေထက်ကိုဆွဲတင်ဖို.လုပ်ကတ်ပါရေ။ ယေခါ ယင်းမမချေစော် ရုန်းပါရေ။ မတက်လိုပါလတ်။ ဇာဖြစ်လို.လေး ဆိုကေ ရီထဲမှာ ရုန်းယင်းကန်ယင်းနဲ. ထဘီ ကျွတ်ကျလားလို.ဆိုပါရေ။ အရှက်ကြီးရေလူဖြစ်တေအတွက်နဲ. အသက်ရာ အဆုံးခံပလိုက်ချင်ပါရေလတ်။ ယင်းနေရာမှာ ကိုယ်ရာဆိုကေ ဇာပိုင်လုပ်ဖို.လေးချင့်။

အရှက်နဲ. အသက်ကိုလှယ်ဖို.လား။ယင်းနေရာမှာ အကျွန်ဆိုကေတော့ ထဘီ ပါပါ မပါပါ တက်လာပါဖို.။ အမိ အဖကို အသူလုပ်ကျွေးဖို.လေး။ ကိုယ့်အရှက်ကိုကြည့်ဖို.လား ကိုယ့်အမိ အဖ ဘဝကို ကြည့်ဖို.လား။ အေအဖြစ်အပျက်တစ်ခုတည်းကြောင့် ကိုယ့်အသက်အဆုံးရှုံးခံဖို.တန်လာ။ အားလုံးကို ထည့်စဉ်းစားကြည့်ရပါဖို.။ စစ်တွေမှာနီခါ ဆံတော်ရှင်ကိုလားလို. လမ်းမှာ ဘုတ်မှောက်ခါ ထဘီကျွတ်လားလို. ရီထဲက မတက်လာပဲနဲ. အသက်အဆုံးခံလားရေ မမချေတယောက်အကြောင်းကို ကြားဖူးပါရေ။ အချေခါက သူရဲကောင်းလို.မှတ်ခရေ။ ငါရာဆိုကေလေ့ ယင်းပိုင်အသက်ဆုံးခံပလိုက်ဖို.။ အရှက်အကွဲမခံ။ သီလို.အလောင်းပေါ်လာခါ တုံးလုံးပါရာ။ ဇာထူးပါလေ။

အရှက်နဲ. သိက္ခ္ခာကို ဇာပိုင်ခွဲခြားကတ်ပါဖို.လေးချင့်။ ငါရှက်တေ ငါသိက္ခာကျလို. ဆိုစော်မျိုးပြောချင်ကေ ဇာအကြောင်းနဲ.ရှက်လေ ဆိုစော်ကို အယင်မီးရပါဖို.။ သိက္ခာဆိုစော်ကို အကျွန်.အနေနဲ. ကိုယ်ကျင့်သိက္ခာလို. ဘာသာပြန်ပါရေ။ ကိုယ်ကျင့်တရားနဲ. ပတ်သတ်တေ။ Integrity.မကောင်းစော်ကိုလုပ်ကေ ရှက်တတ်ရဖို.။ အကျွန်ရို. ဘာသာတရားနဲ.ပြောရကေ သိက္ခာဆိုစော် အကျင့်သီလဖြစ်တေ။ မကောင်းစော်ဆိုစော်ရေ သီလနဲ. မကိုက်ညီရေ အရာအားလုံးကို ခေါ်ပါရေ။ အခြေခံက ငါးပါးသီလ ဆိုကတ်ပါမေ။ ခိုးရေ ဝှက်ရေ လိမ်ရေ အရက်သောက်တေ အစရှိသည်ဖြင့်။ ရခိုင်သားတော်တော်များများရေ အရက်သောက်တေဆိုစော်အချက်စော် မှန်လို.ရှိခကေ အရက်သောက်ပြီးကေ အိပ်နီရေ မသောင်းကျန်းဆိုကေ တောင်မှ မကောင်းမှုကိုလုပ်စော်နဲ. တတူပါပျယ်မဟုတ်ပါလား။ အေလောက်စကားကြီး စကားကျယ်တိ ခံနီရစော် အကြောင်းက အဝတ်အစား နဲ. အရှက်သိက္ခာနဲ.စော် ထင်သလောက်ထိ မပတ်သတ်ဆိုစော်ကိုပြောချင်လို.ပါ။

အယင်တလိုင်းက အွန်လိုင်းမှာတွိသော ရခိုင်သမ အပျိုကြီးမမတစ်ယောက်က ပြောလားပါရေ။ ရခိုင်သမချေတိ အဖော်အချွတ်တိ ကောင်းလုပ်လာရေလတ် အရှက်သိက္ခာကို ထိမ်းစီချင်ရေလို. ပြောလားပါရေ။ အကျွန်က မီးပါရေ အရှက်သိက္ခာမရှိဆိုစော် ကို မမ ဇာပိုင်အဓိပါယ် ဖွင့်ပါလေလို.။ ယေမှာ အတိုအပြတ်ဝတ်ခြင်း ကြိုးတချောင်းဝတ်ခြင်း တစ်ချို.ရခိုင်သမချေတိ ရီကူးဝတ်စုံတိ ဝါတ်လို. အင်တာနက်မှာ ဓါတ်ပုံတင်ခြင်း ရို.ကို ဆိုလိုပါရေလတ်။ အကျွန်ကပြောရေ အကျွန်၇ီကူးဝတ်စုံတော့ မဝတ်ဝံ့ပါ။ မလှလို.လို.။ လှကေ ဝတ်ဖို.လို. ရီကူးကေ။ ကျန်စော် မမ ပြောစော်တိကိုတော့ အားလုံးဝတ်ဖြစ်ပါရေလို.။ အကျွန်ရှက်စရာလို.မယူဆပါလို.။ ကိုယ်ကျင့်သိက္ခာနဲ.ဆိုကေ အဝီးကြီးပါရာလို.။ ဘုရားတောင်မှ ကာလံ ဒေသံ လို.ဟောခမဟုတ်ပါလားလို.။ ယေမှာ မမရို.က ကိုယ့်ထီး ကိုယ့်နန်းနဲ.နီလာရေ ယိုင်ကျေးရေ လူမျိုးတိဖြစ်လို. ယင်းပိုင်မဝတ်သင့်ပါလို.ပြောပါရေ။ ယဉ်ကျေးရေ လူမျိုးစော် အဝတ်အစားခေါင်းကပင် ခြီအထိ ချုပ်ထားရေ လူမျိုးကိုခေါ်ပါလာ။ ယင်းပိုင်ဆိုကေ ဘူချုပ်ထားရေ ကုလားမတိ၊ ကုလားတိလောက် ယဉ်ကျေးစော်လူမျိုး ကမ္ဘာမှာ ရှိပါသိလား။ အကျွန်ရို. ယဉ်ကျေးမှု အစဉ်အလာကြီးမားရေ ဆိုစော်လက်ခံပါရေ။ အဓိကကတော့ ယဉ်ကျေးမှုဆိုစော် ဘာသာတရားကို အခြေခံလို. ဖြစ်တည်လာရေ စကားစုလို.ထင်ပါရေ။ သင့်မြတ်ကောင်းမွန်ရေ ဘာသာတရားကို လိုက်စားပြီးကေ လူတိစော် ယဉ်ကျေးလာကတ်စော်ပါ။ အကျွန် Define လုပ်တေ ဘာသာတရားကို အခြေခံရေ ဆိုစော်ကို ငြင်းလို.ရပါရေ။ စာအုပ်တိကို ကိုးကားပြီးပြောနီစော်မဟုတ်တေ အတွက်ပါ။ ကိုယ့်စိတ်ခံစားချက်သတ်သတ်ပါရာ။ ယိုင်ကျေးမှုကို ဆွဲထည့်ချင်ရေဆိုကေ ခေတ်ဆိုစော်ကိုလေ့ ထည့်တွက်ရပါဖို.။

အခေါက်ပေါင်းမြောက်များစွာ အကျွန် အေအဝတ်အစားနဲ.ပတ်သတ်ပြီးကေ အငြင်းအခုန်ဖြစ်ခဖူးပါရေ။ လူပေါင်းအများကြီးပါ။ တော်တော်များများကတော့ အသက် ၃၅ ကျော်တိများပါရေ။ Generation Gap လို.နားလည်ပါရေ။ တကယ်လို. အသက်အရွယ်အငယ်ပိုင်းက ဆိုကေတော့ အဂုမှ ရွာကရောက်စ သော်လည်းကောင်း၊ ကိုယ်တိုင်အရုပ်အရည်ဆိုး သော မမချေတိက ကိုယ်ဝတ်လို.မလှလို. မဝတ်စော်ကို လူများမမချေတိကို အပုတ်ချလို.သော်လည်းကောင်း၊ တချို.ယောက်ျားချေတိက အငြင်းအခုန်လုပ်ကတ်စော်မှာ ရခိုင်သားမျိုးချစ်စိတ်ဓါတ်ပြချင်လွန်းအားကြီးပြီးကေ အဟင့် ဆို အဟင့် မကောင်းဆိုကေ မကောင်း ပြောမရဆိုမရ တဇူးထိုး လုပ်ကတ်လို.သော်လည်းကောင်း ငြင်းခုန်ကတ်စော်များပါရေ။ အေအကြောင်းကို အရေးတယူလုပ်လို. မပြောစော်လူတိရှိပါရေ။ မျက်စိယဉ်လားဗျယ် ဖြစ်လို.ပါ။ တစ်ခုလေ့ မထူးဆန်းရေ ကိစ္စလို.မှတ်ယူလိုက်လို.ပါ။ တခါတလီ ကိုးရီးယား ထိုင်းရို. ရောက်နီရေ ရခိုင်သားတစ်ချို. ကမ်းခြေတိကို လားပြီးကေ ဘီကီနီဝတ်ထားရေ ကောင်မချေတိနောက်ခံနဲ. (လူလှမလှအရေးမကြီး မမချေတိ အများကြီးပါလီကောင်းလီ) ပုံစံမျိုးနဲ. ရိုက်ထားကတ်စော်တွိရပါရေ။ မမြင်စတ်ဖူး မြင်စတ်ဖူး အဂုမှရောက်တေသိဆိုခါ ကောင်းအထူးအဆန်း ဆာက ကြည့်ရပိုင်တွိကတ်ပါဖို.လားမသိ။ သတိထားပါယေ ယင်းချင့်စော် အရိုက်မတတ်ကေ တရားစွဲလို.ရပါေ၇။ ကိုယ်ကလားလို. မထိ မကိုင်ခီတိုင်း ကြည့်ချင်ပိုင် မျက်လုံးပြူးပါအောင် ကြည့်လို.ရရေ မထင်ပါကေ့။

အေနေရာမှာ တစ်ခုပြောချင်စော်က အတိုအပြတ် အဝတ်အစားရဲသော မမချေတိ အများစုစော် ပါတီတက်၊ ကလပ်လား၊ ဆေးလိပ်သောက်၊ အရက်သောက် လုပ်တေ၊ ရည်းစားများတတ်တေ ဆိုကေ လက်ခံပါလာ ဆိုကေ အတိုင်းအတာ တစ်ခုအထိ လက်ခံပါရေ လို.ဝန်ခံရပါဖို.။ အများစုလို. စကားခံ ထားပါရေ။ အားလုံးမဟုတ်ပါ။ အဓိက က စတီရီယို တိုက်ပ် လုပ်ပစ်ကတ်လို. ရှိပါဖို.။ အကျွန် ကာကွယ် ပြောဆိုနီရေ အချက်အလက်စော် မမချေတယောက် ကာလ ဒေသ အလျောက် ကိုယ်ဝတ်ချင်စော်ကို လွတ်လွတ်လပ်လပ် ဝတ်စားနိုင်ခွင့်ရှိခြင်း တစ်ခုတည်းရာ ပါပြီးကေ အရက်သောက်ခွင့်ပါမစ်တောင်းနီစော်မဟုတ်ပါဂါး။  ပါတိတ်ချေဝတ် သနပ်ခါးချေ ပကွက်ကွက် ပြီးကေ ဝမ်းကြီးလားရေ ရွာက မမချေတရှိစော်ကို မမိပါကေ့။ စတီရီယို တိုက်ပ် လုပ်စော်ကို နည်းနည်းလျှော့ဖို.လိုရေ လို.ထင်ပါရေ။ ထမီချေနဲ. ပါးကွက်ချေနဲ.နီစော်ကို မကန်.ကွက်ပါ။ အကျွန်လေ့ ကိုယ့်ပြည်ကို ပြန်ကေ ထမီနဲ. ပါးကွက်နဲ.နီပါရေ။ တကယ်လို. မမချေတိ ထိမ်းသိမ်း သင့်ရေဆိုကေ အရက်သောက်စော် တိ၊ ဆလိပ်သောက်စော်တိ၊ ယောက်ျားတကာ နဲ. အတွဲများစော်တိကို ဆွဲလို. ထိမ်းဖို.ပြောရပါဖို.။ ပါတီလားစော်ရေ လုံးဝမကောင်းလို.လက်မခံပါ။ ကိုယ့်ပါးမှာ ဇာတ်ပွဲလားရေ သဘောနဲ.တတူပါရာ။ ကိုယ့်စော်ကို ကိုယ်ထိမ်းနိုင်ဖို.ရာ အရေးကြီးပါရေ။ အခုက အတိုချေဝတ်ကေပင် ကိုယ့်သိက္ခာထိမ်းကတ်ပါပျင်နီကတ်ခါ အေလူ စာမတတ်လီလာချင့်လို. ခံစားရပါရေ။

မမချေတိဖက်ကလေ့ ပျင်သင့်စော်တိ ရှိပါရေ။ အခုခေတ်မှာ တော့ အတွဲများစော်ပေါ့။ ကြားရပါရေ အများကြီးပါရာ။ မယူပဲ တတူနီရေအကြောင်း၊ တယောက်လက်က တယောက်ပြောင်းလခရေအကြောင်း။ ၃ယောက်လောက် ရည်းစားရှိမှ ဂုဏ်တက်တေလို. ထင်ကြောင်း။ ယင်းချင့်တိကတော့ နည်းနည်းလွန်လားဗျယ်ထင်ပါရေ။ အဓိက က ကိုယ်ကျင့်တရားနဲ.ပတ်သက်ပြီးကေ မဖောက်ဖျက်ဖို.လိုပါရေ။ အမိ အဖ ဂုဏ်သိက္ခာ ကိုထည့်လို.တွက်ရပါဖို.။ အကျွန်.အမိအဖစော် ထော ခိုင်ဝေဇံ မီနီစကပ်ဝတ်လို.လတ်ဟေး အေပိုင်လေ့ရှိလာ ဆိုလို အကျွန်.ကို ဆဲဖို.အမိအဖမျိုးမဟုတ်ပါ။ အကျွန်..အသက်အရွယ်မှာ ကိုယ့်အဝတ်အစားကို ကိုယ့်စိတ်ကြိုက်ဝတ်ခွင့်ရှိရေ။ ငါ့သမီးစော် ညဏ်နဲ. ပညာနဲ. အတိုင်းထက်အလွန်လုပ်ဖို.မဟုတ်လို. ယုံပါရေ။  အမိရို.ရှိကတော့ အကျွန်လေ့ မဝတ်ပါ။ အေး နင့်သမီးမှာ ရည်းစား ၃ ယောက်လောက်ရှိရေ လတ်ထော၊ မူးလို. ရူးလို.ထော ဆိုကေတော့ ဒုံးပျံစီးလို. ရခိုင်အလံလွှင့်လို. ဓါးကိုင်လို. လိုက်လာကတ်ဖို.။

အိမ်း အေပိုင်စော် စာကို အေအမ်ပီမှာ တင်ပစ်ခီကေ ဘလောက် အဆဲခံရမေ မသိ။ အခုကိုယ့်ဘလော့မှာကိုယ် ဆိုခါ အရေးမကြီး။း) အေအမ်ပီလေ့ နိုင်ငံရေး ဝက်ဘ်ဆိုဒ် ပုံစံ ဖြစ်လားဗျယ်လို.ပြောပါယင့်။ ကောင်းပါရေ။ အားလုံးသူ လက်လှမ်းမှီရေ နိုင်ငံရေး ဘလော့တစ်ခုဖြစ်လီကေလေ့ ကောင်းရေမဟုတ်ပါလားရေ။ အကျွန်.အနေနဲ. ဆိုကေ တော့ အေအမ်ပီကို ဝင်ပစ်ခီလို. ရခိုင်ကို တဖေ့ချေပိုလို. ချစ်လာရေလို. ပြောလို.ရပါရေ။ အေကနီ အေထက် အဆ အောင်မြင်ပါစီလို. ဆုတောင်းပီးလိုက်ပါယင့်။ ယေကေလေ့ ရခိုင်သားတိ ရခိုင်သမတိ အဝတ်အစား ကိုနားလည်ပီးနိုင်ပါစီလို.တော့ ဆုမတောင်းဗျယ်။ ဆုတောင်းကေလေ့ နားလည်နိုင်ဖို.မဟုတ်ဆိုစော်ကို သိလို.။ နားမလည်ပီးနိုင်ကေလေ့ အပြောင်းအလဲတိကို ရင်နာနာနဲ. ထိုင်ဆဲရုံကလွဲကေ တခုလေ့လုပ်လို.ရလီဖို.မဟုတ်။  ပြောင်းစရာရှိစော်တိကတော့ ပြောင်းလီဖို.စော်ပါရာယေ။

ခိုင်ဝေဇံ